លោកឧត្តមសេនីយ៍ត្រី ម៉េង ស្រ៊ុន មេបញ្ជាការកងរាជអាវុធហត្ថខេត្តកំពង់ស្ពឺ បានឱ្យដឹងថា ជារៀងរាល់យប់ កម្លាំងអាវុធហត្ថតែងធ្វើការល្បាតដើម្បីការពារសន្តិសុខ សណ្តាប់ធ្នាប់ជូនប្រជាពលរដ្ឋ ។
ក្នុងប្រតិបត្តិការល្បាតនោះ ក៏បានប្រទះឃើញក្រុមយុវជនមួយក្រុមមានគ្នាប្រមាណជាង ១០នាក់ ជិះម៉ូតូច្រើនគ្រឿង នៅចំណុចផ្សាររាត្រី ស្ថិតក្នុងក្រុងច្បារមន ខេត្តកំពង់ស្ពឺ ដោយក្នុងនោះពួកគេបានអូសផ្គាក់លើផ្លូវ ដើម្បីគំរាមដល់ភាគីម្ខាងទៀត ដែលសង្ស័យជាគូសត្រូវ ។
ក្រោយឃើញសកម្មភាពបែបនេះ កម្លាំងល្បាតអាវុធហត្ថក៏បានដេញតាម ឃើញដូច្នេះក្រុមក្មេងទំនើងទាំងនោះក៏បានបើកម៉ូតូរត់បែកហ្វូងគ្នាអស់ អកុសលមានតែយុវជន ៦នាក់ប៉ុណ្ណោះ ត្រូវបានចាប់ខ្លួនយកមកសាកសួរនៅទីបញ្ជាការអាវុធហត្ថខេត្ត ។
យុវជនជាក្មេងទំនើងទាំង ៦នាក់ ដែលឃាត់ខ្លួន រួមមាន៖
១-ឈ្មោះ វឿន សុខវ៉ាត់ ភេទប្រុស អាយុ ១៧ឆ្នាំ
២-ឈ្មោះ ស៊ីម សារ៉ូ ភេទប្រុស អាយុ ១៨ឆ្នាំ
៣-ឈ្មោះ ផាន់ ជាវ៉ៃ ភេទប្រុស អាយុ ១៦ឆ្នាំ
៤-ឈ្មោះ រ៉ី ពេជ្រ ភេទប្រុស អាយុ ១៧ឆ្នាំ អ្នកទាំង៤ បច្ចុប្បន្នរស់នៅភូមិក្រាំងគគី ឃុំហោងសំណំ ស្រុកឱរ៉ាល់ ខេត្តកំពង់ស្ពឺ
៥-ឈ្មោះ កែវ សារី ភេទប្រុស អាយុ ១៩ឆ្នាំ
និងទី៦-ឈ្មោះ ឃុម រ៉ាវុធ ភេទប្រុស អាយុ ១៧ឆ្នាំ បច្ចុប្បន្នរស់នៅភូមិអញ្ញាសេះ ឃុំទ័ពមាន ស្រុកថ្ពង ខេត្តកំពង់ស្ពឺ ។
នៅក្នុងប្រតិបត្តិការដេញចាប់នេះដែរ កម្លាំងជំនាញក៏បានចាប់យកវត្ថុតាងបាន រួមមាន៖ ម៉ូតូចំនួន ៣គ្រឿង (ម៉ាក Honda ពណ៌ខ្មៅ សេរីឆ្នាំ២០២២ ផ្លាកលេខ កំពង់ស្ពឺ 1X-4121, ម៉ាក Honda ទឹកមាស សេរីឆ្នាំ២០១៩ ផ្លាកលេខ កំពង់ស្ពឺ 1Q-3381, ម៉ាក Honda ពណ៌ខ្មៅ សេរី ឆ្នាំ២០២៤ ផ្លាកលេខ កំពង់ស្ពឺ 1Z-9382), ទូរសព្ទ ចំនួន ៥គ្រឿង និងកាំបិតផ្គាក់ ចំនួន ១ដើម ។
សូមបញ្ជាក់ផងដែរថា ក្រោយបញ្ជូនក្មេងទំនើងទាំង ៦នាក់ទៅកាន់សាលាដំបូងខេត្តកំពង់ស្ពឺភ្លាម មានដំណឹងមកថាឪពុកម្តាយរបស់ក្មេងទំនើងទាំង ៦នាក់នោះ បានចំណាយលុយយ៉ាងច្រើន ដើម្បីស្វែងរកអ្នកជួយអន្តរាគមន៍ដោះលែងឱ្យមានសេរីភាពវិញ ប៉ុន្តែគេនៅមិនទាន់ដឹងទេថា អយ្យការសម្រេចឱ្យរួចខ្លួនដែរឬយ៉ាងណានោះទេ តែបើតាមបទបញ្ជាយ៉ាងម៉ឺងម៉ាត់របស់លោក ជាម ចន្ទ័សោភ័ណ ប្រធានគណបញ្ជាការឯកភាព និងជាអភិបាលខេត្ត បានណែនាំដល់ប្រធានសាលាដំបូង និងព្រះរាជអាជ្ញាឱ្យដាក់ទោសទណ្ឌឱ្យធ្ងន់ធ្ងរ ដើម្បីឱ្យក្មេងទំនើងទាំងនោះមានការរៀងចាល ៕
No comments:
Post a Comment